About Courses


بسم الله الرحمن الرحيم

مكتبه الكورسات لتعليم اللغات

طبعا كلنا عارفين  قد ايه احنا محتاجين نتعلم لغه ، سواء كنا طلبه فى المدارس أو الجامعات أو حتى اتخرجنا وبنشتغل ، او حتى محتاجين اللغة علشان نتقدم فى شغلنا ، أو عاوزينها علشان ناخد شهادة متخصصه فى لغة معينه .. مثلا فى الإنجليزية زى TOEFL   و IELTS .

أكبر مشاكل بتقابلنا فى اللغة عموما هى

– مشكله النطق الصحيح للكلمات

– مشكله اننا نعرف نسمع كويس من الأجانب

ولحل المشكلتين دول عامه بيلجأ أغلبنا انه ياخد كورسات فى مركز معين .. وطبعا لازم ياخدها فى مكان محترم علشان فعلا تتعلم اللغة ومتضيعشى وقتك وفى نفس الوقت تاخد شهاده محترمه ..

فى المراكز دى فى البداية بتعمل امتحان تحديد مستوى (بفلوس طبعا) وده علشان يعرفوا مستواك فى اللغه وانك مؤهل تدخل المستوى الكام ؟ وبعد كده المستويات بتكون كتير واكيد اسعار المستوي دى غاليه ولو مثلا قلنا أقل تمن لمستوى لغة هيكون 400 مثلا دا طبعا غير الكتب والأسطوانات اللى حضرتك المفروض بتشتريها ..  فشوف انت بقى على ما تتعلم اللغة كلها هتدفع كام ؟ وشوف المواصلات والتعب اللى انت هتتعبه على ما تتعلم اللغه دى ؟

وطبعا المراكز دى بتدرس اللغات بشكل عام مش متخصص ومش بيركز على حاجه معينه ( يعنى مثلا بيعلمك معظم مهارات اللغة اللى ممكن تحتاجها زى الكتابة و القراءة والاستماع والتحدث .. بس من غير تعمق .. لإن اللغة مجالها واسع .. وبالتالى هوه بيركز على الأساسيات بس .. ولو سألت اللى بيدرسلك اللغة : إزاى أتقدم فى المهارات دى أكتر ؟ .. هيقولك : إنك تشتغل كويس مع نفسك وتشمع كتير وتقرأ كتير وتشوف نشرات أخبار كتير .. وطبعا ده كلام كويس بس مفيهوش مواظبة .. وغالبا لما تسمع لقناه اخباريه أجنبيه للغة انت أصلا لسه بتتعلمها يدوب هتفهم الضمائر وبس .. وده لسبب السرعة فى النطق عندهم وبكده يبقى الطريق هدى ملهاش نتيجة كويسه )

غير الدراسة العامة للغة فيه كورسات بتبقى متخصصه لهدف معين .. زى كورسات المحادثة والكورسات اللى بتعلم إزاى تكتب الخطابات والفاكسات والإميلات الرسمية  وكده يعنى .. إلخ .. إلخ .. إلخ ..

وطبعا فى الكورسات دى انت بتدرس اللغة بشكل أكاديمي ( يعنى قواعد نحويه وتركيب جمل وحل تمارين ) بشكل مش بطال .. بس ده طبعا لو خلصت كل المستويات .. ومجت شفى النص وقابلتك مشاكل فلو او وقت ..

ولو هنتكلم عن المهارات اللى قولتلك عليها زى التحدث والاستماع .. فهتلاقى عندك مشكله كبيره .. وهتحس إن كل الى اتعلمته ملهوش لازمه .. لإن ايه فايده الكورس لما ميخلكش تعرف تتكلم أو تفهم اللى بيتقال وتتعامل زى اهل اللغة نفسها ؟!!

كمان فى الكورسات دى هتقابلك مشكله .. وهى ان اللى بيدرسلك (فى الغالب) هيكون مصرى ومتعلم اللغة دى وهوه ممكن يكون راجل محترف و 100% ، بس عمره ما هيتكلم زى اهل اللغة نفسيهم .. زيها زى ما بتشوف اجنبى بيتكلم عربى كويس بتبقى فاهمه لكن فى نفس الوقت متاكده انه مش مصرى . وهنا بييجى التصادم لما تتعلم كل المستويات دى وتروح تتكلم مع أجنبى فتتكسف وتحس انك مش قادر تجاريه فى كلامه .. بتفكر فى تركيب الجملة قبل ما تتكلم .. تفهم كلامه بعد ما يخلص الجملة ومش فى أثناء كلامه .. كل ده مبيخلكشى تعرف تتواصل معاهم كويس .. وطبعا لو بتشتغل أو هتشتغل فى مجال له علاقه مباشره بالأجانب .. يبقى الكلام ده مش هينفع خالص 😦

طب نعمل ايه علشان نحسن اللغة بتاعتنا ؟؟؟!!!!

انا هقولكم …

فيه شركات عالمية .. ظهرت فى أمريكا واوروبا .. الشركات دى كل وظيفتها انها تخدمك فى النقطة دى بالذات ..

إزاى يعنى ؟؟!!!

الشركات دى بتجيب أفضل الخبراء فى العالم فى مجال تعليم اللغات . وتسجلهم الكورسات بتاعتهم وتعملهالك فى برنامج متكامل .. وبعد كده تعرضهالك للبيع .. وبكده هتتعلم وانت فى بيتك .. فى أى وقت .. وهتاخد اللغة من اهلها .. وفيه خاصيه التعرف الصوتى .. عينى البرنامج هينطقلك الكلمة مظبوط وبعدين حضرتك تقولها فى المايك وبتكنولوجيا التعرف الصوتى  Voice Recognition البرنامج هيقولك انت نطقت الكلمة صح ولا لأ ؟ .. كمان هيخليك تتكلم وتتفاعل مع التمارين الصوتية اللى فيه وكمان فيه فيديوهات وتمارين وألعاب 🙂

والبرامج دى طبعا بتبتدى معاك من المستوى المبتدئ ثم المتوسط ثم المتقدم ثم المحترف .. وبتعملك كل فتره تقييم علشان تشوف مستواك وصل لفين ؟؟

ممتاز جدا .. خلاص نشترى كورسات الشركات دى

لأ استنى .. فيه مشكله فى الكورسات دى ..

اولا : الأسعار الأصليه للكورسات دى كام ؟

الأسعار الأصلية للكورسات دى غاليه جدا .. يعنى فيه كورسات بتوصل تمنها الأصلى لـ 650 دولار .. يعنى بالمصرى يعنى بالميت كده 3.5 ألف جنيه .. يعنى بتمن المستويات كلها فى أى مركز .. وخلى بالك ده لبرنامج واحد بس .. وطبعا هما مش حاطين السعر ده إلا لأنهم عارفين كويس قيمه الحاجه دى ..

ثانيا : هتشتريها منين ؟

بفرض انك دخلت الموقع الرسمى وعجبك الكورس او برنامج معين لشركه ما .. وقولت انك خلاص هتشتريه .. جميل .. بس منين ؟؟؟

الشركات دى للإسف ملهاش فروع فى الشرق الأوسط .. وبالتالى الحل الوحيد انك تشتريها من الموقع الرسمى ولازم يكون معاك كارت ائتمان Credit Card .. وطبعا انت متضمنشى انه ممكن حد يسرق بيناتك ولا حاجه ويسحب رصيدك كله 😦 .. وخلى بالك انه هيزيد عليك تمن الشحن .. والله اعلم هيوصل لكام ؟ .. ده غير الجمارك اللى ممكن توصل لتمن الكورس نفسه 😦

حيرتنا معاك .. طب مفيش حل ؟!!!!

طبعا فيه حل .. وإلا مكنتش بتكلم معاكم دلوقتى هههههههههه

العبد لله وفر ليكم أشهر وأفضل واغلى الكورسات العالمية فى تعليم اللغات على مستوى العالم .. سواء كانت سلاسل فيديو أو برامج تعليميه أو كورسات صوتيه أو …. إلخ . وكل ده ليكم ببلاش أيون ببلاش وسيبك من الأسعار الأصلية خالص .

يعنى تابعوا المدونه اول بأول واشتركوا فيها علشان يوصلكم الجديد ديما .. وانا أول بأول بإذن الله هضيف كورسات جامده جدا لمعظم لغات العالم .. كل اللى عليك انك تتابع وتحمل الكورسات دى .. ومن أشهر الشركات العالمية المتخصصة فى مجال انتاج كورسات اللغات ..

الكورسات دى فيها كورسات متكاملة بتعلمك اللغه كامله ,, وفيها برضو كورسات مهمتها تعلمك اساسيات اللغة دى .. ملخص ليها يعنى (زى التحية والكلام فى المطار والفنادق والمطاعم والمحلات وفى البنك وكده يعنى .. وده ينفع قوى للسياح اللى رايحين يتفسحوا فى بلد تانيه ) وممكن تساعد الناس اللى حابه تتعلم شويه فى لغة من غير ما تتخصص فيها قوى .

مع ملاحظه انه بسبب ان هذه الكورسات جميعها من أشهر الشركات العالمية المتخصصة فى مجال شروحات اللغات .. فبالتالى معظم الكورسات دى (وليس الكل) اللغة المعتمدة للشرح هى اللغة الإنجليزية .. ولكن لأن الشرح بالفيديو  فسوف تعرف جيدا ما يتم تطبيقه امامك .. وستستمتع بالشرح بلغه إنجليزيه بسيطة وسهله .. حيث ان هذه الشركات تراعى ان هذه الكورسات للعالم كله .. سواء للناطقين بالإنجليزية او الغير ناطقين بها ..

مع العلم انه أيضا متوفر كورسات شرح باللغة العربية .. فلا تقلقوا أبدا

الكورسات دى هتفيدك أكيد .. سواء لسه عاوز تتعلم اللغة أو حتى لو كنت محترف .. لأنك فى الحالتين هتتعلم على ايد أفضل الخبراء على مستوى العالم فى كل لغه .

 وكله ببلاش يا معلم  🙂 .. كل اللى بطلبه منك دعوه صالحه لى ولأهلى .. وكمان تنشر الكورسات دى لكل اللى تعرف علشان تنشر المعرفه وتاخد ثواب كمان 🙂

يعنى تابعوا المدونه اول بأول واشتركوا فيها علشان يوصلكم الجديد ديما .. وانا أول بأول بإذن الله هضيف كورسات جامده جدا لمعظم لغات العالم ..

6 Responses to “About Courses”

  1. Em An 06/09/2011 at 12:45 AM #

    بجد مجهود رائع

  2. Ashraf Sharaf 14/09/2011 at 9:43 AM #

    جزاك الله خير وكتر الف خيرك علي المجهود الكبير وهتابعك علي تويتر كمان

    • mu7amad 14/09/2011 at 4:36 PM #

      وجزاك خير إن شاء الله .. شكرا جزيلا .. وبالطبع تشرفنى متابعتك

  3. eng 23/10/2011 at 4:47 PM #

    جزاك الله كل خير طب ممكن اسئل حضرتك سوال هو ده يعتبر سرقه ولا لا؟

    • mu7amad 18/12/2011 at 7:27 AM #

      بوص حضرتك .. قانون حمايه الملكيه الفكريه اجاز خرقه فى حاله التعليم ,, وطبعا احنا عاوزين الحاجات دى عشلان نتعلم .. يبقى كده مخرقناش القانون وبالتالى مش حرام .. والله اعلم

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: